Wamanukera

Hįxųnųikregi, Ho’ųnį xųnųik eja xete wįįne. Eegi waagax hajoocieja waakišip gają, waagax hajooci hohąkši eja hahi, Teejopeja. Ǧook hižą wa’ųaježe hišeną. Eegi Teejopeja hacišųnų gają, goišip nįgeeja mąąnįšųnų. Nįįžu regi nigeešge waahuhi regi, goišip waagax hajoocieja mąąnįšųnų. Hąke wažątire hižą nee hanįnį. Eegi waikąnąkra ke yaaperesjįnį. Eegi Ho’ųnį xųnųik eja hakiri gają, hiraijera mąąnį tuxurukže yaare.

Hagoreižą, hegų waagax hajoocieja howataaregi, Ho’ųnį xųnųik eja hakiri. Koreesge mąą kook nųųp anąga kerepąną here. Eegi koreesgešge Caa Mąą-hinąǧowira nįgeešge Caa Hikiruxe wiira here. Waagax hakiruxarara hisge hacakje eesge, eegi woore yaakišerekje esge, eegi hakohi gisewe hižą eja waanį raagų. Eegi peewįnįsge. Goišip waagax hakiruxara hocira haipįže yaare. Eesge, ciinąkeja hahi eegi waagax hakiruxara hocieja mąąnį tee. Mąą wigųsra hižąkira mąąnįkjeesge, žegų kiira.

Koreesge howagįxra joop, eeja haape anąga woorera yaakišere. Waagax hakiruxarara haca eegi wibocacaš kook (hakaranį hahi) eja woorera yaakišere. Eegi waakišip gają, hocieja howaakere. Ciinąk reekuhuhieja hotowe tahe. Eegi nąągu xete eja hahigają, hipušakje esge. Nąągu xete nųųpra eeja bookicguxire, nąągu-nųųpašąnąra anąga hakeweašąnąra. Hatažara hegų nąąp ziira hįgiwahaire. Eegi, eeja haape gają, hocįcįna nųųp nąąkeja caawaire.

“Aho! Jaasge raaraje?” hįgiwąxire. “Aho, hįpįaje. Nįšge jaanįsge harajawi?” “Hąąhą, hįpįajawi. Eejaxjį, nąągu xųnųik saanįkeja hįnakižuwi šerekje. Eegi žuura hašįnįna hųųrak’ųkjanawi. Jaagu hirare?”

Hocįcįna hinųpike kuukukire nįsge, nųnįge, Ke waakiza raagųnį. Hąke mąįšją waa’ųnįnąkšąną. Koreesge mąąhį hižą hanįiregųnį yaare. Eegi pąą hižą hak’į hanįhe. Eejaxjį nųawąkgi, hųųxarairenągajeere. Nųnįge žuurara nąga wibocacaš kook hanįna hąke wowaak’ų raagųnį. Heejąga, hatažara wąksgaa mąnįra hįgiwahairawi. Nąągu xete hatuce hajikere. Eegi hocįcįna hįnųxaire. Hegų haizo mąąnį.

Nąągu eeja peewį nąga wowaagitakšąną. “Koreesge warukosra iirokit’e hagi’ųkje. Jaagu hirarawi?” Eegi hižąkicųšgųnį-hižąkira-hižąkira boacacaššąną. “Snitch”, hįįgaire eegi hocįcįną hikaraiwįxira anąga hakja hosinįhoguija mąąnįire.

Hirarexjį gają, warukosra žige iirokit’e hįįgi’ųire. “Jaagu rooragų? Hocįcį nąąka yaa’awi. Eegi wawiyakipereswi. Goišip wowąk nąąkšąną. Juvee eeja ’ųanihaire. Press-charges rooragų?” Že’e wa’e haawi. Eegi heejąga, “Ka” wawiyage.

*Koreesge hąąpra nųųp haixaregi, hicakoro haara homaakįnį hahi. Eegi hįgiwąxšąną, “Hicakoro ceek waraaga, peežega wa’ųnąąk?” “Peežega?” “Hąąp hižą, ciinąkeja hahi anąga hanįcawi, neexjį hireanąga hocįcįna nųųp.” “Haa! Hicakoro ceek wahaara, žuura nee hanįna ruus nąą’įire. Hįnagijišerenągajeere!”