Nųwąkra hisge

Mąą kerepąną hįjiihuwira, kiiwanų hižą nųawąk nąą’į. Marathon hižą waaganąkšąną. Eegi hikoroho gają, hari nįsge nųawąk hanįhe, nųnįge huporo kąą hižą hįtek hakį. Eegi hakocąk nįsge xgąązi hakį nųnįge žige yaakikoroho nąą’į. Eegi marathonra nųawąk regi, mąą wigųsra kerepąną nųųp anąga hižąkira eja tuušjąkjeesge. Huporo kąą haanįra žige hįtekšąną. Že’e haixa regi, žige xgąązi hakį anąga huporo kąąra hįįšarakšąną.

Eegi Seattle regi, howaixąną haixa regi, hegų hagaira nųawąkšąną. Eegi hicakoro haara, Toddga, hišge nųwąk gipį. Eegi Toddga ceek nįsge hįgiwąxšąną, haakižu nųawąk raagųgi. Eegi ceekeja, Seattle cąągeja hahiwišųnų. Issaquah eja hahiwišųnų, eegi xee xeteeja honąk eja hanųawąkwi. Xee xetera wicąwą sįįc serec xee xetera higaire. Keešge howagįx hižą wažątire homįanąkwinį. Eegi žeeja mąą wigųsra hižąkiraašąną hįǧereįk nįsge nųawąkwišųnų. Toddga goišip warucra hisge nąga nįį wirusge hižą waanį hii. Eegi honąk kisak eja, nįšąnąk hipaija hipušawi anąga hįkuhe wahacwi anąga nįįra hisge tacgąwi. Eegi žige nųwąk waakišipwi.

Eegi koreesge mąą hakewe hįjiihuwira, tookregi, woirakį Toddga hari nįsge nųwąk roogųxjį. Eegi hįgikarahe. Coonįregi, Tee Pratt anąga Dewey nįšąnąkra eeja hahiwi. Eegi žige Toddga hirawahas anąga Dewey nįšąnąk cooweja hipušawi. Eeja nųawąk hajikerewi. Eegi hąąp serec nįsge, koreesge howagįxra haruwąk nųawąkwi gųnį yaare. Hinųpike warucra hisge nąga nįį wirusge hižą waanį hahiiwi. Eegi hįǧereįk nįsge nųawąkwi anąga hagaira hipušawi. Nųnįge mąą wigųsra kerepąną nųųp nųawąkwi. Eeja, nąągu eja žige hagiwi. Eegi neexjį, hąke hiraijera nųawąk tuxuruknį, eesge eeja hamįkšąną. Eegi Toddga mąą wigųs hižą hiraijera nųwąk anąga wažątire eja gii. Eegi hakja hirawahas anąga Seattle regi hakarawi.

Eegi koreesge haramįhe haixa regi, Toddga žige hįgiwąxšąną, hari hiraijera nųawąk raagųgi. Eegi “Mąą wigųsra jaanąga?” Toddga yaagipąxšąną. “Kerepąną nųųp anąga nųųp. Mąą wigųsra nųųp kiira hiraijera herekjene,” hįįge. “Hihą, hįrekje.” Eegi xee xete hižą cooweja nųawąkwi. Xee xetera Glacier Peak higaire. Xee peec hožu hižą wa’ųnąkšąną. Eegi žige hįǧereįk nįsge nųawąkwi, eegi hagaira hipušawi anąga wahacwi anąga nįįra hisge tuusgewi anąga taacgąwi. Eegi waakišipwigają, hįįcgexjįwi. Mąą wigųsra kerepąną nųųp nųnąwąk haixa gi, mąą wigųsra nųųp woocexixjįirekje.

Tookregi, koreesge hijopahą žige nųawąkwi. Haga hižą, North Cascades eja hahiwi. Nąągu xete kerepąną nųųpra hikijąija hipušawi. Eeja nųawąk hajikerewi anąga xee ra hatukąnąkwi. Xee kųhąija nįį hawosįc hižą eja t’ųųpire. Eegi tee hižą gųsire. Mąą wigųsra nųųp haixa eja, tee hikijąija, wooruwį hižą eja aakšąną. Eegi wooruwį eja hipušawi anąga waac hižą waanącwi. Eegi tee eja mąą wigųsra saacą nįawąwi. Žeeja ąąc kąnąkwi anąga žige nųawąk hajikerewi. Eegi mąą wigųsra hižąkiraašąną nųawąkwi anąga yaakaraiwįxwi anąga hakja nųawąkwi. Eegi žige waac eja homįanąkwi anąga tee eja hakja nįawąwi. Eegi ąąc kąnąkwi gają, žige mąą wigųsra nųųp nųawąkwi anąga xee ra waatiwi.

Eegi nųwąk hiraagnįra, hoharixjįra nųawąkwi. Mąą wigųsra kerepąną taanį nąga hižąkira nųawąkwi. Eegi wąkšik nųwąk gipįra hisge waakižu hahiwi. Wąkšik nąąka hanąąc kiiwanų mąąkiracire. Mąą wigųsra hogihiižą nųwąkire’oire. Eesge nųwąk hikicgaire.

Wąkšik nąąka wanąǧoowąkire nįsge hire wahii. Eegi že’e wawiyage. Eegi hižąkišąną wažąra hikisge waire, “Wąkšikra hisge hiraijera nųwąk ruxurukšąną. Eegi wąkšik nąąka wanaǧoowąkire s’aare.” Eegi wąkšik hižą hiragišawąxgiži, “mąą wigųsra hogihiižą jaasge nųnąwąk?” “Wąkšikra hisge mąą wigųsra hogihi nųųp nųwąkire” nįgixapgajeere.

Hižą hųųgirakšąną, kiiwanų hižą nųwąkgįnį. Eeja mąą wigųsra hogihi nųųp nąga kerepąną saacą nųwąkšąną. Eegi nųwąkgają, hiyuša anąga hokižac nąąžį. Hacįįja nąągu coowe nigeešge nąąke ra hąke hegų hiperesnį. Eesge eja hiyuša anąga wąk hijąhi hižą hagipekjeesge. Hicągeerexjį hižą huhe eegi žige hacįįja hapahiirera hiperes nąga nųwąk ruxurukšąną. Eegi hagaira nųwąk’ąk’ų, šjųųwaxjį anąga hįįcgexjįgejene, hąątešųnų, hįįge. Wąk hižą hihąąte, eegi wąkra cooweja nųwąk anąga hosaagre hikisge nųwąk gigi. Wąkšik nąąka koreesge wanąǧoowąkire. Nųnįge wookoreesge nįsge.

Eegi Thorp xee xete eja hahiwi. Eegi žige hąąp serec nųawąkwi. Nųnįge waakišipwiregi, nųųxgisu hakituwįwi. Eegi haracapra aasjį. Že’e hegų hoharixjįra nųawąkšąną. Žegų kiira.