Mąą ruti wigųs
Ho’ųnį xųnųįk eja xete wįįne. Eegi waagax hajooci waakišip’jaa’ų, waagax hajooci hohąkši eja howateera mąąkitacšąną. Nųnįge jaagu ha’ųkjenera, hąke yaaperesnį. Goišip woikarap hikišerera haipį. Eegi mąą hiragnįra, waagax hajoocieja, calculus anąga physics 2 waakitusšąną. Koreesge physics, wocainą hiperes yaagekjene.
Eegi Teejopeja howateekjana’oire, nųnįge hąke hegų jaagu yaakišerera yaaperesnį. Koreesge woikarap yaakišerekjeneže yaare. Nųnįge že’e haixa, jaasge yaa’ųra, hąke yaaperesnį. Hąke woikarapra yaa’ų tuxuruknįže yaare. Eegi hąąp hižą, wocainą hiperes waagigųsra hųgirakšąną, wocainą hiperes hirakišeregi, horohąną woikarap hikišerera hiš’ųkjene. Eegi žeesge teejopeja waagax hajoocieja hahiregi, wocainą hiperesra yaakišere.
Eegi Teejop eja hahi anąga waagax hajoocira haipį. Eegi wažąra roohąxjį hįgigusire. Eegi mąą rutira hųųgirakire. Eegi mąą rutira, roohąxjį higiraire nųnįge roohą hąke hegų hiperesiranį. Eegi waagax hajooci waakišip yaakikorohoregi, jaasge wocainą hiperes yaa’ųrašge hąke yaaperesnį. Nųnįge hiraijera yaakišereną. Eegi mąą rutira hiraijera yaaperes raagų. Eesge Seattle regi haji. Eegi waagax haja hohąkši eja hahi. Eegi wąkšikra hisge mąą rutira wigųs hanįhaire. Eegi wąkšik nąąka waakižu wate.
Jaasge mąą rutira yaagųswira honįįgitakikjanawi. Yaa’ųcakjene. Wiirokųra yaa’ųwira torsion balance hižą wawigaire. Eegi wiigihuhu hižą wa’ųjee. Wiginą ksuuksikjį hižą yaa’ųwi anąga wažą sgįįgre xųnųįk hižą higišik hakąnąkwi. Jaagu higišik hakąnąkwira, koreesge wisgįįgrera yaagekjene, hakihąhą horupįnįpįnį nįsge. Eegi wiginą ksuuksikjį gejene, horupįnįpįnį woowat’ekįkjį. Mąą rutira kšiikšišjį, eesge ha’ųwi.
Wažąra hanąąc mąą rutira hi’ųiranąga kikirutiire. Mąą rutira kšiikšišjį, eesge horohąną hąke hųųwesįwįwinį. Nųnįge mąąra xetexjį anąga sgįįgrexjį wa’ųąkšąną. Eesge hanąącixjį, hįbookawawigają, mąąija hįkįnįpwi. Eegi koreesge wiginą ksuuksik hižą hiš’ųną nąga wažą sgįįgrera nųųp aki’ake higišik rakąnąkną. Eegi wažą sgįįgre hijąhi hižą saįkeja wažą sgįįgre coonįra hipaija rakąnąkgi, wigihuhura coowexjį horupįnįkjene.
Eegi wisgįįgre eja hokiikjąp hižą hakąnąkwi. Eegi hatažą hižą yaa’ųwi anąga hokiikjąpra hiroajįwi anąga horupįnįpįnįra yaagųs tuxurukwi. Wisgįįgrera horupįnįpįnįgają, hatažarašge hixgąxgąkjene. Hataža hixgąxgąra yaagųswi, eesge horupįnįra yaapereswi. Eegi žeesge mąą rutira wigihuhura horupįnįpįnį hiiregi, že’e yaagųswi.
Eegi waagax hajooci hohąkši eja mąą rutira ašgexjįra yaagųsšąną. Wisgįįgre eja wažą sgįįgrera nųųp higišik rakąnąknąže hihe. Nųnįge eecą wažą sgįįgrera hogihiižą nąga kerepąną nųųp hikisge nįsge wigihuhueja higišik hakąnąkšąną. Mąąs sgaa ceexi waagax’ap hižą yaa’ų. Platinum sheet hižą waaganąkšąną. Eegi mąąs sgaa ceexi waagax’apeja hopoxra hogihiižą nąga kerepąną nųųp haihapwi. Hopoxra paraparacire nįsge. Eegi hirasašge hopoxra haruwąkašąną haihapwi, hopox coonįra hirowagįx haihapwi. Hopox hocąkenąija, mąąsra wažą sgįįgre wa’ųire.
Eegi hinųpaha ha’ųwi. Mąąs sgaa ceexi waagax’ap winųpra hikisge ha’ųwi. Eegi hinųpike yaa’ųwi. Hižą, wisgįįgrera reec eja hat’ųpwi. Eegi mąąs wiginą ksuuksikjį hižą yaa’uwį anąga higišik hakąnąkwi. Že’e wigihuhura here. Eegi wigihuhura kųųhaija, wiroipįnį hižą hakerewi. Eegi wiroipįnį hihakeja, mąąs sgaa ceexi wagax’ap winųpra hat’ųųpwi. Eegi wiroipįnįra horupįnį haawigi, wigihuhura hišge hakihąhą horupįnįpįnį. Mąąs sgaa ceexira kikirutiire gejene. Wiroipįnįra hagakirahą horupįnį haawigi, wigihuhura hogihiižą nąga kerepąną nųųp hakihąhą horupįnįpįnį hireanąga haruwąkašąną hakihąhą horupįnįpįnį.
Eegi wigihuhura nąga wiroipįnįra ašgexjį hixgąxgą haa tuxurukwi. Eegi hoharira hokirac wigihuhu horupįnįpįnįra yaagųswi. Hoharira, ašgexjįra nąąjų hižą hoksuuksikra hikisge yaagųswi. Že’e, 50 \(\mu\)m waaganąkšąną.
Koreesge, že’e eegišge wocainą hiperesra roohąxjį here. Eegi wiyahįcjį haa. Eesge taašjąkjene.